Shu yilning 25-noyabr sanasida O‘zbekiston jurnalistika va ommaviy kommunikatsiyalar universitetida oliy toifali diktor, “Shuxrat” medali sohibi, “Axborot 24” dasturi boshlovchisi Jamshid Umirzoqov bilan ijodiy uchrashuv bo‘lib o‘tdi. Yoshlar uchun chinakam na’muna bo‘ladigan, radio va televideniye sohasida boshlovchilik borasida katta tajribaga ega, suxandonlik maktabini o‘tagan qadrli mehmon talabalar uchun mahorat darsini olib bordi. E’tiborli jihati shundaki, ushbu uchrashuvda masofada turib tahsil olayotgan talabalar ham ZOOM orqali seminarda ishtirok etish imkoniga ega bo‘lishdi.

Mahorat darsida Jamshid Umirzoqov efir olib borish san’ati, tele-va radioyangilik yetkazishning farqli jihatlari, boshlovchiga qo‘yilgan talablar haqida gapirib berdi. Shuningdek, jonli efirda ishlash mas’uliyati, so‘zlarni aniq va ravon talaffuz qilish borasida aniq misollar bilan tushuntirib berdi.

Talabalarning mazkur ijodiy uchrashuvdan olgan taasurotlari katta bo‘ldi:

“Mehmonimizni jon-qulog‘imiz bilan tingladik. Dastlab kichik master-klass bilan boshlangan uchrashuv yakuni tengqurlarim tomonidan yog‘dirilgan savol-javoblarga ulanib ketdi. Shaxsan meni Jamshid Umirzoqovning talabalarning har bir savoliga atroflicha, kamtarlik va bosiqlik bilan javob berishlari o‘ziga tortdi”, - deydi O‘zJOKUning 2-bosqich talabasi Guloro Yusupova. “Uchrashuv nihoyalanar ekan hech bir talaba bu muloqotning yakunlanishini istamadi. Mehmonimiz bilan xayrlasha turib hali o‘z ustimizda juda ko‘p ishlashimiz kerakligini men qatori hamma talaba his etdi”.

Ijodiy uchrashuvda yoshlar o‘zlarini qiziqtirgan savollariga javob olishdi. Bu tadbir talabalar uchun haqiqiy mahorat maktabi vazifasini o‘tadi desak mubolag‘a bo‘lmaydi.