Kuni kecha O‘zbekiston jurnalistika va ommaviy kommunikatsiyalar universitetida Qozog‘iston Respublikasining M.S.Narikbayev nomidagi KAZGUU universiteti raisi Talgat Maksutovich Narikbayev, universitet raisining birinchi o‘rinbosari Galimjan Kudaybergenov va universitet vakili Rauf Zuparov mehmon bo‘ldilar.

Mehmonlarni O‘zJOKU rektori, professor Sherzodxon Qudratxo‘ja va universitet jamoasi birgalikda kutib oldilar.

O‘zJOKU va KAZGUU o‘rtasida o‘tgan yili imzolangan hamkorlik memorandumining ko‘p bandlari ijrosi pandemiya sababli amalga oshmay qolgandi. Ushbu tashrif ana shu memorandumni yangilash, unga yangi takliflar kiritish, har ikki universitet shu bilan birga ikki qardosh mamlakat o‘rtasidagi munosabatlarni mustahkamlashga qaratildi.

Kelayotgan o‘quv yilidan boshlab, O‘zJOKU va KAZGUU o‘rtasida double degree dasturi ishga tushirilishi va ushbu dastur doirasida bizning talabalar Qozog‘istonda, qozog‘istonlik talabalar esa bizda 2 yildan o‘qib, 2 ta mamlakat diplomiga ega bo‘lishlari rejalashtirilmoqda.

Yaqin kunlarda ushbu dasturning barcha jihatlari bo‘yicha takliflar o‘rganib chiqilib, amaliyotga tatbiq etilishi va shu o‘quv yilidan boshlab qo‘shma dastur bo‘yicha talabalarni o‘qishga qabul qilish boshlanishi kutilmoqda.

Uchrashuv yakunida har ikki taraf vakillari o‘z universitetlari va mamlakatlarini eslatib turuvchi esdalik sovg‘alarni bir birlariga taqdim etdilar. Bu hamkorlik ikki qardosh mamlakatlarning kelajakdagi yanada yaqin do‘stlik munosabatlariga hissa qo‘shishiga umid qilamiz!