Bugun O‘zbekiston Jurnalistika va ommaviy kommunikatsiyalar universitetida radio kuni bo‘ldi.

Universitetga poytaxtimizda faoliyat yuritayotgan radiokanallar: “O‘zbekiston” teleradiokanali, “O‘zbekiston 24” radiosi, “Yoshlar” radiosi, “Avtoradio”, “Navro‘z FM”, “Oriyat FM”, “Oriyat Dono”, “Poytaxt”, “O‘zbegim taronasi” radiolarining direktorlari va bosh muharrirlari taklif etilib, radioning kelajakdagi rejalari, sohaning rivojiga doir masalalar muhokama etildi.

Mehmonlar universitet odatiga ko‘ra avvalo muassasa binolari bilan tanishdilar. “My sweet home”, talabalar press klubi, universitetning 7-qavatidagi ochiq ayvoni, Ozod Sharofiddinov muzeyi, mobil muzeylar, telestudiya va radio studiyalarni tomosha qilishdi. Radiostudiyani kuzatish vaqtida mehmonlar radioefirda bevosita ishtirok etishdi, studiyaning professional holati, texnikalariga mutaxassis sifatida juda yaxshi baho berib, yana o‘z maslahatlarini ham ayashmadi.

Dumaloq stol atrofida muammolarga bag‘ishlangan davra suhbatida esa radio mutaxassislari universitetda tahsil olayotgan talabalarga o‘rgatilishi lozim bo‘lgan fanlar, kerakli bilimlar nimalardan iborat ekanini alohida ta’kidlab, lozim bo‘lsa o‘quv dasturlarini tuzishda yordam berishga tayyor ekanlarini bildirishdi.

- “Talabalar radioga borganda faqat ovozi chiroyli bo‘lganlari qoladi deb o‘ylashlari, ovozing tushmaydi deyishimiz bilan ketib qolishlari to‘g‘ri emas. Radioda boshlovchilikdan boshqa faoliyat turlari ham ko‘p, ovozi mos kelmasa tovushlarni his etishi yuqori darajada bo‘lishi mumkin va bu o‘sha talabaning kamchiligi emas aynan yutug‘idir” dedi suhbat davomida “Oriyat FM” radiosi direktori Bahtiyor Usmonov.

Tashrif doirasida taklif etilgan radiokanallar mas’ullari bilan universitet o‘rtasida hamkorlik memorandumlari ham imzolandi. Jurnalistlar uchrashuv so‘ngida universitetning yangi tashkil etilgan “Media qahvaxona”sida mehmon bo‘lishdi va har birlari o‘z radiokanallariga bir qancha yosh kadrlarni ishga taklif etishga tayyorliklarini bildirishdi.

Bugungi samimiy hamkorlik yana uzoq yillar davom etishiga umid qilgan holda, yuqorida nomlari keltirilgan radiokanallar va O‘zJOKUni yangi hamkorliklar bilan muborakbod etib qolamiz!